တိကျတဲ့မှတ်ချက်ပါဝင်တဲ့ အီယန်ရိုက်ရဲ့ အမြင်

အီယန်ရိုက်ကတော့ နော်ဝေသား အိုဒီဂတ်ရဲ့ လက်ရှိပြသနေတဲ့စွမ်းဆောင်ရည်နဲ့ပတ်သတ်ပြီး အခုလိုပဲပြောပြလာပါတယ်။

“ အသင်းရဲ့ ကစားပုံက တော်တော်လေးတည်တည်ငြိမ်ငြိမ်ရှိနေပါတယ်။ အိုဒီဂတ်ရဲ့ အခန်းကဏ္ဏကလည်း ဒီအချက်အတွက်ကြီးမားတဲ့သက်ရောက်မှုရှိနေပါတယ် “  လို့  BBC ရဲ့ Match Of the Day အစီအစဥ်နဲ့တွေ့ဆုံရာမှာ ပြောကြားလာတာဖြစ်ပါတယ်။  

အာဆင်နယ်ဂန္တဝင်ကြီးအပါအဝင် Pundit အများစုက  အိုဒီဂတ်ကို ဝိုင်းပြီးချီးကျူးနေကြတာက အခုလပိုင်းတွေမှာထူးဆန်းတဲ့သတင်းတော့မဟုတ်ပါဘူး။ ဒါပေမယ့် အီယန်ရိုက်ရဲ့  ချီးကျူးမှုကတော့ “ ကောင်းပါတယ် “  ဆိုတဲ့  ယေဘူယျဆန်တဲ့စကားတင်မကပဲ  တိကျတဲ့မှတ်ချက်တစ်ခုပါဝင်နေတာဖြစ်ပါတယ်။

“  ကျွန်တော့်အမြင်တော့ အာဆင်နယ်အသင်းမှာ Play Maker တစ်ယောက်ပြန်မွေးဖွားလာခဲ့ပြီဗျ၊  ကျောနံပါတ် ၁၀ ရဲ့ အခန်းကဏ္ဏနဲ့  လုပ်ဆောင်ချက်တွေကို ခင်ဗျားတို့အားလုံးသိကြမှာပါ၊ အိုဒီဂတ်ရဲ့ နေရာယူပုံ ကစားပုံတွေက တကယ့်ကိုတည်ငြိမ်လွန်းလှပါတယ် .. ကျွန်တော်ပြောဖူးပါတယ်။ သူက မပြာဘူးဗျ “

“ ခင်ဗျားလိုချင်တာလဲ ဒါပဲဗျ …  ကျွန်တော်တို့အားလုံး ကွင်းလယ်ကစားသမားတစ်ယောက်ဆီကနေလိုချင်တာ အဲ့တာပဲ။  တစ်ကွင်းလုံးကို အကျိုးသက်ရောက်မှုကောင်းကောင်းပေးနိုင်တဲ့အရာတစ်ခုကို သူယူလာတယ် .. အဲ့တာပဲ “  လို့  တိတိကျကျမှတ်ချက်ပြုခဲ့တာပါ။

စပိန်သတင်းထောက်  ဟက်တာ အင်ဒရေ  ကလည်း အိုဒီဂတ်ဆီကနေ ကိန်းဂဏန်းတွေသာမကပဲ  ပြိုင်ဖက်တွေကြောက်နေရတဲ့ ခံစားချက်ကိုပါရရှိစေတယ်ဆိုပြီး ပြောဆိုထားပါတယ်။  နော်ဝေသားဟာ  အာဆင်နယ်အသင်းအတွက်  ဒီရာသီမှာ ၅ ဂိုးသွင်း  ၄ ဂိုးဖန်တီးပေးထားနိုင်ပါတယ်။

အီယန်ရိုက်ကပဲ​  “  အိုဇေးလ်ဆီကနေ အခုလိုကစားပုံမျိုးကိုမျှော်လင့်ခဲ့တာပါ။  ရိုးရှင်းတယ် လွယ်ကူတယ်။ သိပ်ကိုလှပတဲ့ကစားဟန်ပေါ့ “  ဆိုပြီး နာမည်ထုတ်ဖော်နှိုင်းယှဥ်ပြောခဲ့ပါတယ်။ ဒါ့အပြင်  အိုဒီဂတ်ဟာ လူငယ်တွေအတွက် ကောင်းမွန်တဲ့ နမူနာတွေကို ယူဆောင်လာတယ်လို့လဲဆိုပါတယ်။

“  လူငယ်ကစားသမားလေးတွေက အိုဒီဂတ်လို ကစားသမားတစ်ယောက်ရဲ့ ကစားပုံကို စောင့်ကြည့်တယ်ဆိုပါစို့ ..  ရုပ်ပိုင်းဆိုင်ရာ ကစားဟန်တွေကိုပဲဆိုလိုတယ်လို့ မယူဆပါနဲ့ .. သူကအရာအားလုံးကို ရိုးရိုးရှင်းရှင်းနဲ့ ပြီးမြောက်အောင်လုပ်ဆောင်နေတာပါ။  သူဘေးပတ်ပတ်လည်မှာ နေရာလွတ်တွေအများကြီးပါ။  ဒါဟာ သူ့ဆီကနေရလာနိုင်တဲ့  ယုံကြည်ချက်ရှိတဲ့ ခံစားချက်ပါပဲ “

အနှစ်ချုပ်လိုက်ရင်တော့  အိုဒီဂတ်ရဲ့ အချိန်တွေလို့ ဆိုရမယ့်ပုံပါ။  အာတိတာရဲ့  နာမည်ထုတ်ဖော်ချီးကျူးမှုကိုလဲ လက်စတာနဲ့ပွဲအပြီးမှာရရှိထားပါသေးတယ်။ နော်ဝေသားဟာ  လန်ဒန်မြို့ခဲ့တွေနဲ့ ကောင်းကောင်းကြီးချိတ်ဆက်နိုင်ခဲ့ပြီလို့  ယူဆရပါတယ်။